kimoun An Yé

kimoun An Yé

---

An sé patriyòt Gégé . an sé mètmakè a blog k nou yé. on blòg ki ka bay kamo yenky an lang gwadloupéyen. An pa la pou malpalé ponmoun . Men pou lévé gawoulé asi konpòtasyon Kolonialis a léta fwansé an péyi gwadloup. On péyi é on pèp ki anba jouk a péyi fwansé ja ni plis ki 300 lanné . Plis ki 300 lanné péyi fwansé ka èspwaté pèp gwadloup.

Nou travay ba yo pou ayen , nou goumé adan lagè ba yo san pon rèkonésans , nou mèt entélijans an nou an favè a matris fondalnatalman rasis é négwofòb a yo , nou woupwézanté é voyé monté péyi a yo adan tout kalité konpétisyon a ispò é dòt koté ankò . An finaldikont , nou ka konstaté ki y tini plis ki 300 lanné nou ka woulé ba yo . Lè-la rivé pou nou woulé ban nou .

Mwen Patriyòt Gégé , an sé on GWADLOUPEYEN , ki vlé di , Nasyon an mwen sé Péyi GWADLOUP .  On bannzil an mitan karaib-la. bannzil-la-sa tini on kilti ki ta-y , on listwa ki ta-y , on lang ki ta-y , on pèp ki ta-y.

	sa kivlédi péyi gwadloup pani ahak a vwè épi péyi fwansé ki ka touvé-y a 8000 km a GWADLOUP an mwen .sèl byten ki ka lyanné Gwadloupéyen é fwansé dèpi nanninannan , sé on rapòw kolonial .Davwa , dèpi lèsklavaj bout , fwansé poko pé jenmen pé admèt ki pèp GWADLOUP dètèt égal pièt
égal  mòdan  épi	pep  é péyi fwansé .

Pèp fwansé ka kwè toujou ki nou pa moun , kivlédi , nou pépa vin rèsponsab a péyi an nou . é dayèpouyonn péyi-la two bèl pou kité-y ba Gwadloupéyen . é sé pouki y ka anvayi péyi an nou épi manblo-ay , télé-ay , radyo-ay , fonksyonè-ay . ki fè ki alèkilé an tèt a tout bank , tout enstitisyon piblik , oben menm pwivé , ou ka touvé yenki fwansé an tèt-ay (Pou nou pa di blan) . tout kad a tout antwoupwiz gwadloup sé fwansé . alòs ki Gwadloupeyen , yo osi , yo fè onlo lékòl , men pou yo touvé travay , fè yo janbé dlo pou pa jenmen déviré an péyi a yo. Yo ka kryé sa on jénosid paw sibstitisyon . é sa sé on krim kont péyi Gwadloup é pèp-ay .

Jodijou lè la rivé pou Gwadloupéyen arété rimé bonda a yo , jwé mizik tout lajouné , é palé yenki dè kòk kòkòt , koké , lanmou ,men pito jété on zyé asi divini a péyi a yo , péyi a pitit a yo. Pou fè moun rispèkté PEP GWADLOUP , é rikonnèt ki y tini on NASYON GWADLOUP épi Gwadloupéyen rèsponsab.

fòs 

ola an yé :     knouye.over-blog.com

an sé :   Gégé ,

blog-la fèt :  25-01-2006

 

 

Cumul global

Les statistiques générales du blog knouye depuis sa création 

Date de création :	25/01/2006
Pages vues :	20 222 (total)
Visiteurs uniques :	8 396
Journée record :	29/12/2007 ( 188 Pages vues )
Mois record :	06/2007 ( 1165 Pages vues )